Ibon Iradi presoaren zigor suspentsio eskaera maiatzaren 12an aztertuko da

Argitaratua: 19 ordu eta 40 minutu

Herrira elkarteak jakinarazi du larriki eri den Ibon Iradi Fernandez euskal presoaren zigor suspentsio eskaera maiatzaren 12an aztertuko duela frantses justiziak. Esklerosis ainizkoitza diagnostikatua izan zitzaiola eta, "Ibonek ezin du segitu kartzeleratua", eta horregatik zigorraren suspensio medikal bat eskatu zuen, baldintza batzuekin aske izateko. "Eskaera hau duela urte bat egin" zuela oroitarazten du Herrirak, "azkenean audientzia bat burutuko" dela nabarmenduz. Horren karietara, Herrira elkarteak azpimarratu nahi izan du "ze luzeak izan diren Ibonen desmartsa guziak, bai bere eritasuna detektatzeko edota zigor suspentsioa". Maiatzaren 10ean, I. Iradiren aldeko gizakate bat eginen da Baionan. Irakurri ere Ibon Iradi Fernandezi egindako elkarrizketa.

Willis Drummondek kide berria ezagutarazteko bira eginen du maiatzan

Argitaratua: 15 ordu eta 59 minutu

Maiatzatik goiti, Willis Drummond taldeak kide berri bat izanen du: Joseba B. Lenoir gitarrista. Duela aste bost musikariak elkarlanean ari direla "Joseba B.Lenoir & Willis Drummond VS Neil Young & Crazy Horse" konzertu berezia prestatzeko, apirilaren 30ean Bilboko Kafe Antzokian emanen dutena, kantari kanadiarraren omenez. Baina kolaborazio hori luzatu egingo da musikari beratarra Willis Drummond taldearen bosgarren kidea bilakatuko baita. Taldearen handitzea ospatzeko eta sustraietara itzultzeko hamar eguneko bira eginen dute Euskal Herri osoan zehar maiatzaren 15etik 24ra. Azken hitzoruda Kanboko gaztetxean izanen da.

"Irisgarritasunaren barometroa" gainditu du Donibane Lohizunek

Argitaratua: 15 ordu eta 59 minutu

Pirineo Atlantikoetako departamenduko Handi64 elkarteak "Irisgarritasunaren barometroa" plazaratu egin du, eta jasotako datuen arabera, traba arkitektoniko eta bestelakoak ezabatzeko edo gainditzeko ahalegin handiena egin dituzten herriak Donibane Lohizune, Angelu eta Uztaritze direla esan daiteke. 2005.eko eskubide eta aukera berdintasunerako legean oinarrituta, ahalmen urritasuna duten pertsonen inguruan lanean ari diren zazpi elkarte batu dira neurketa hori egiteko, 5.000 biztanletik gorako departamenduko 22 herrietako Herriko Etxeei ikerekta bidaliz.

Bertako produktuak saltzeko denda berri bat ideki dute Bastida inguruko 11 laborarik

Argitaratua: 22 ordu eta 25 minutu

Ipar Euskal Herriko hamaika laborari elkartu dira "Les Fermiers Basques" saltokia Bastidan idekitzeko. Bertan, "lekuko, kalitatezko eta sasoinezko etxe ekoizpenak" salduko dituzte laborariek. Izan ere, eskualdeko laborariak aldizkatzen dira saltegia idekitzeko eta haien etxe ekoizpena jasatarazteko. Euren ekoizpenetaz edo etxaldeetaz hitz egiteazgain, AOP, Bio, Idoki edo Kintoa kalitate urratsei buruzko informazioak emateko gai dira laborariak. Saltegi berriak maiatzaren 1etik 4ra ate idekiak antolatuko ditu, 10:00etatik 19:00etara.

Bertokiratzearen eta trantsizioaren aldeko hitzaldiak burutuko ditu Bizi !-k

Argitaratua: 22 ordu eta 27 minutu

Asteburu honetan, Bizi ! mugimendu altermundialistak eztabaidak eta hitzaldiak antolatuko ditu, Urruñan eta Ainhize Monjolosen. Hain zuzen, ostiralean "Bertokira dezagun" gaualdia burutuko du Bizik, Urruñako Itsas Mendia zinegelan. Bertan, Nils Aguilarren "Cultures en transition" filma eman ondoren, bertokiratzearei buruzko eztabaida bat antolatuko da Euskal Herriko Laborantza Ganbarako presidente den Mixel Berhocoirigoinekin, Eusko euskal monetaren koordinaketako kide den Emmanuel Castagnetekin, eta Bizi !-ko Ttantsizio taldeko kide den Marion Realekin. Biharamunean, Joseba Azkarraga soziologoak "Elikadura, energia, ekoizpena, enpleguak…? zer nolako burujabetza krisia gainditzeko ?" hitzaldia eskainiko du Baxe Nafarroan. Maiatzaren 1ean, "ekonomiaren eta gure bizien bertokiratzearen aldeko" manifestazio "alaia eta aldarrikatzailea" burutuko du Baionan.

Giza katerako spoterako irudiak Baionan grabatuko ditu Gure Esku Dagok

Argitaratua: 2014-04-23 15:31:12

Ekainaren 8an Gure Esku Dago dinamikak antolatuko duen giza kate erraldoiaren karietara, "Gure Esku Bidea" giza katerako spota grabatuko dute hurrengo egunetan Euskal Herriko zonbait hiritan. Baionan, larunbatean 12:30tan hasiko da bideoaren grabaketa, Kontseilu Orokorraren pareko pentzean, Baiona ttipian. Lapurdiko hiriburuan grabatuko da lehen spota et hurrengo egunetan Donostia, Bilbo, Gasteiz, Bardeak, Iruñea eta Berriozarren burutuko dira beste grabaketak. Herri bakoitzean 100 partehartzaile inguru beharrezkoak dira, eta bideo guztien artean ekainaren 8ko giza katera parte hartzeko spota eginen dute. Partehartzeko, harremana@gureeskudago.net helbidean izena eman behar da. Ikusi ere giza katearen dinamika martxan ezartzeko bideoa.

Jon Anzaren aldeko ekitaldia ostiralean Urruñan, bere desagerpenaren bosgarren urteurrenean

Argitaratua: 2014-04-23 13:42:29

2009ko apirilaren 18an desagertu zen Jon Anza euskal militantea, Baionako geltokian Tolosara eraman zuen trena hartu eta gero. Abantzu urtebete beraduago, 2010ko martxoaren 11an, iheslariaren gorputza agertu zen Okzitaniako hirian, Purpan erietxearen morguean. Bere desagerpenaren bosgarren urteurrena bete dela eta, "Egia nahi dugu" lemapean ekitaldi bat burutuko da Urruñako plazan, 20:00etatik goiti. Ekitaldi politikoa Urruñan eginen denez, normalean hilabeteko azken ostiralean Hendaian egiten den euskal preso eta ihelsarien aldeko elgarretaratzea Urruñan eginen da, biribilgunean, 19:00tan.

Irudia

"Euskal Herrian erabaki, Zazpiak bat" lemapean Aberri eguna ospatu dute Larresoron, Iruñean egun handiaren bezperan. Argazkia: Sylvain SENCRISTO.