Le Maire ministroa Itsas Lizeoa bisitatu eta arrantzaleen ordezkariekin elkartu da Ziburun
Laborantza eta Arrantza ministroak etxea du Senperen eta maiz etortzen da Euskal Herrira. Gaur Ziburura etorri da bisitan eta horregatik goizetik ez ohiko CRS hedatzea zen Zokoan. Bruno Le Maire auzoan kokatzen den Itsas Lizeoan izan da, "arrantza, laborantza bezala, geroa duen jarduera dela baieztatzeko gogoz". Eguerdian, ardi esne ekoizleak, lehenik, eta ondoren ELBko laborariak ministroaren kolaboratzaileekin elkartu dira sektoreak pairatzen duen krisiaz mintzateko. Bestalde, bere iritzia eman du AHTren egitasmoari buruz. Gaurko bisitan anfitrio lanetan aritu den Michele Alliot-Marie ministro ohiaren ildoa segituz, AHTren abantailak kolokan jarri eta egungo trenbideak arramoldatzearen alde azaldu da Le Maire.
Txus Martini askatasun eskaera ukatu diote bere osasu egoerak txarrera egin badu ere
Txus Martin 2002ko urtarrilean atxilotu zuten. Estatu Frantziarreko espetxeetan 8 urte igaro ondoren Espainiara eraman zuten. 8 urte hauetan erabat bakartua egoteak eragin zuzena izan du egun duen gaixotasunean. Txus Martinek nahasmen eskizo-afektiboa du, delirio osagarriekin. 2010. urtean bere buruaz beste egiten ere saiatu zen. Bere egoera ez da batere ona. Izan ere, Espainiako Auzitegi Nazionalak fiskaltzak aurkeztu txostenak soilik aintzat hartuta, Martin preso atxikitzea erabaki du.
II. Gaztezulo saria Arnaldo Otegirentzat
Iragan irailaz geroztik eta abendurarte Gaztezulo.com webguneko Eztabaidagunean sailaren bidez hedabide honen irakurleek proposatutako izen guztien artean, Elgoibarko politikariak jaso ditu boto gehien. Gaztezuloko kideak Elgoibarrera, bere herrira, hurbildu dira Arnaldo Otegiren gertukoen iritzia hartzeko. Ondoren, bere etxera joan dira buruzagi independentistaren aurpegi pribatua gehiago ezagutzera eta senitartekoen eskuetan garaikurra uztera. ( Hemen bideoa ).
Seaska prest da Baxoko azterketak oztopatzeko azterketa hori euskaraz izan dadin lortzeko
- 200 lagun inguru bildu dira gaur eguerdian baxoa euskaraz egiteko eskubidea aldarrikatzeko Baionan eginiko elkarretaratzean. Mobilizazioa Seaskak deitu du Bernat Etxepare lizeoko ikasleek emandako urratsa sostengatuz. Iaz bezala aurten ere baxoa euskaraz pasatzeko paradarik ez dute Seaskako lizeotarrek. Mobilizazioan nabarmendu dutenez, frantses legea ez da oztopo, berez frantsesa ez den beste hizkuntza batean azterketak egiteko aukera ematen duelako legeak. Berez, "nahikeria politikoa aski dela" eskubide hori bermatzeko nabarmendu du Seaskak euskalgintzako eragileen presentzian irakurritako agiri batean. Horregatik, Ipar Euskal Herriko ikastolen lehendakaria, Paxkal Indok hauxe iragarri du: "Seaska prest da Baxoako azterketak oztopatzeko, froga hori euskaraz izan dadin".
Elurra kostara heldu da eta barnealdean tenperaturek 14 gradu zero azpira jo dute zonbait tokitan
Europako ekialdetik etorritako hotza eta elurra giroa Euskal Herrira heldu da. Landa guneetarik kostara negu giroan sartuak gira. Baxe Nafarroan eta Xiberuan, baina baita Lapurdiko kostan ere, mendi kaskoak xuri-xuri dira eta goiz huntan bideetan arazo handirik ez bazen ere, eguerdian egoerak okerrera egin du. Lapurdin, Bidarte eta Hendaia artean elurra ari da etengabe gaur eguerditik. Baionan, ordea, egoera lasaia da. Hotza handia dago, hori bai. Barnealdean 7 eta 14 gradu zero azpira jo dute tenperaturek. Bistan dena San Martin Harrian edo Iratin eginiko neurketak dira. ( Tenperaturak eta eguraldi iragarpenak herriz herri )
Euskal preso politikoen aldeko bazkaria Donazaharren
Intza Oxandabaratz, Julen Mujika eta beste euskal preso politikoen aldeko bazkaria izanen da datorren igandean Otsailaren 5ean Donazaharreko gelan. Zintzur bustitzea 12tiko goiti, arratsaldeko 2tan bazkaria Nat eta Watson alaiturik.
Gabonetan desagertu zen Baionako komertsantearen gorpua atzeman dute
Poliziak baieztatu duenez, gabon gauean desagertu zen baionarra hilik atzeman zuten iragan asteartean. Bere etxetik gertu azaldu da Christophe Irabide komertsantearen gorpua. Autopsiak baieztatu zuenez, gizonak bere buruaz beste egin zuen.
Ipar Euskal Herriko eragileak presente dira Parisen zabalik den Expolangues azokan
Pariseko Expolangues azoka abian da Parisen. Etxepare institutuak gidatuko du lehen aldiz euskal ordekaritza hizkuntzen azokan. Ipar Euskal Herriko eragileek ez diote muzin egingo hitzorduari. Hartara, Euskara hizkuntza Frantzian hitzaldia eskainiko du, ostiralean, Argitxu Camus Etchecopar, Sorbonne III Unibertsitatean euskara irakurleak. Egun horretan bertan, Maddi Oihenart kantariak kontzertua eskainiko du Sorbonne III Unibertsitatean, Jérémy Garat musikariarekin batera. Otsailaren 4an, larunbatarekin, Ur Apalategi idazleak hitzaldia emanen du azokan, Euskal literatura globalizazioaren garaian izenburupean.
"Tokiko hizkuntzak eta konstituzioa: etena ala jarraipena?" lelopean mahaingurua antolatu du Baionako Fakultateak
Inspekzioa akademikoak hainbat klase elebidunen itxiera erabaki ondoren, epaitegira jo zuten buraso alsaziarrek. Iragan maiatzean, Frantziako Kontseilu Konstituzionalak buraso alsaziarrek bideraturiko auziaren mamiari heldu gabe, Konstituzionalak 75.1 artikuluari buruz bere interpretazioa eskaini zuen, lehen aldikoz. Ebazpen hori oinarritzat hartuta, tokiko hizkuntzak eta frantziar Konstituzioa arteko loturak -edo etenak...- aztertuko dituzte, otsailak 3an, ostiralarekin, Baionako Fakultateak antolatu mintzaldian.
Kontseilu Nagusiak 750 milioi euroko buxeta aurreikusten du 2012rako
Departamenduko Kontseilu Nagusiko Georges Labazée ( PS ) lehendakariak, finantzen arduraduna Philippe Garcia ( PS ) lehendakari ordeak eta elkartasunan politikoen kudeaketa daraman Kotte Ecenarro ( PS ) lehendakari ordeak 2012ko aurreikusirik den buxeta aurkeztu dute. Otsailaren 2 eta 3ko jardunaldietan buxetaren orientazioak jorratuko dira eta martxoaren 23an bozkatuko da. Bi datu garrantzitsu nabarmendu dituzte: zergak ez dituztela emendatuko eta gizarte gastuari eutsiko diotela. Bestalde, Tours-Bordele AHTren zatiarentzat diru-aurreikuspenak igo egin dituzte. "Iaz hitzartutako 79 miliotik, aurten 16 milioi euro ematekotan ginen baina, badaezpada ere, beste 5 milioi gehitu ditugu" jakinarazi du Garciak.
