Ertzaintzaren lan eremua Iparraldera zabalduko duen akordioa sinatuko dute Gasteizen
Espainiako Barne ministroak eta EAEko gobernuaren Barne sailburuak heldu den astelehenean izenpetuko dute akordioa, Gasteizen. Hitzarmenaren arabera, Ertzaintzak lan iraunkorra burutuko du Hendaiako komisaldegian. Bereziki inmigrazioa eta narkotrafiko arlotan jardungo du EAEko polizia. Alta «terrorismoaren aurkako borroka»ren karietara beste akordioak iragarriko direla argitaratu du gaur Bizkaiko egunkari batek.
"El Correo español-El pueblo vasco" egunkariak gaur plazaratu duen informazioaren arabera, Ertzaintza iraunkor izanen da laster Lapurdin. Alfredo Perez Rubalcabak eta Rodolfo Aresek heldu den astean izenpetuko dute hitzarmena. Preseski, Segurtasun Batzordearen bilera baliatuko dute frantziar polizia frantsesarekin Ertzaintzak garatuko duen elkarlana zehazteko. Dagoeneko, joan den irailean « ondorengo hilebetetan » hartuko zutela Ertzaintza Lapurdin zabaltzeko erabakia iragarri zuen Rucalcaba ministroak (hona hemen albistea, espainolez )
Bizkaiko kazetak emandako informazioaren arabera, bereziki inmigrazio eta narkotrafikoaren aurkako lanetan jardungo du Ertzaintzak Iparraldean. Alta, «terrorismoaren aurkako borroka» eta «polizien arteko informazio trukaketa» aipagai izanen dituzte baita ere heldu den asteko bilkuran.
Dagoeneko Hendaiako polizi-etxean frantziar eta espainiar poliziek batera lan egiten dute. Ofizialki, bere eginkizun nagusia «mugaz gaindiko delikuentziaren» kontra borrokatzea izanen da.
Bestalde, Guardia Zibila eta Espainiako Poliziako ajenteek aspalditik jarduten dute frantziar adiskidekin batera Pauen zoin Baionako komisaldegietan. Lehen gorputz militarraren presentzia ohikoa da ETAren aurkako polizi operazioetan eta oro har euskal mugimendu independentista jomuga duten operazioetan.
EAJk Barne Saila kudeatzen zuenean, Madrilek behin eta berriro ukatu zuen Ertzaintza Ipar Euskal Herrian jarduteko Gasteizeko gobernuak erregularki luzatzen zion eskaera. Schengen-eko akordioak aipatuz, polizien arteko elkarlana «estatu segurtasun indarren artean« burutu behar zela erraiten zuen Madrilek.
Oraingoan, ordea, badira zazpi urtez geroztik Mossos d'Esquadrako kideek Kataluniako iparraldean egiten duten lana aurrekari gisa aipatuz Ertzaintzaren lan eremua zabaltzeko prest azaldu da Zapateroren Gobernua.
