Pariseko Garaipen Arkoan Jon Anzaren auzia salatu duten ekintzaileek polizien jarrera salatu dute libre gelditu ondoren

- 10 iruzkin

Zortzi euskal ekintzaile libre gelditu dira ostiral gauean eta beste bat Pariseko erietxean zegoen Garaipen Arkoan Jon Anzaren desagerpena salatzeko protesta ikusgarria burutu eta oren batzutara. Goizeko 10.30ak aldera oroigarri famatuaren goikaldera igo eta banderola erraldoia zabaldu dute. Ekintza burutzen ari zirela gazte bat erori eta zauritu da. Agiri baten bidez istripua nola gertatu den azaldu dute. Bere erranetan, «poliziak arribatu direnean, gure oharpenen kontra lehen ekintzaile bat deslotu dute; horren ondorioz soka berean loturik zen bigarren gaztea 20 metrotik behera erori da". Gazteak, zorionez, orkatila bat bihurrituta eta ubeldura batzuk besterik ez ditu. Larunbat gauean bueltatu zen Euskal Herrira.
29 urteko ekintzailea Pariseko Ponpidou erietxean zegoen ostiral gauean, baina larunbat gauean bere etxera sartu zen. Gorputzean ubeldura anitz baditu, eta orkatiletan minduan ere. Zauri arinak, 20 metrotik erori zela kontutan izateko.

Berarekin batera, Jon Anzaren desagerpena salatzeko goizean buruturiko ekintzan parte hartu zuten beste zazpi lagun eta argazkiak hartzen zen zortzigarren bat atxilotu ditu Poliziak. Eguna komisaldegian eman ondoren ostiral gauean libre geratu dira.

Komisaldegitik atera eta gero, ekintzaile gazteak pairatu duen istripuaren ardura poliziari egotzi diote. Bere erranetan, gazteek horren kontra oharrarazi badute ere, "poliziek gazte bat deslotu dute, ondorioz soka berean atxikia zen bigarren gaztea 20 metrotik erori delarik".

Hona hemen agiri horretan gazteek emandako azalpenak hitzez-hitz: "Goizeko 11:00etan 4 pertsona zintzilikatu dira, arkuaren bi aldeetara, batak bestearen kontra pisua eginez. Bertan ziren zaindariei ekintza pazifista bat zela eta lasai egoteko eskatu diegu. Baina suhiltzaileekin batera polizia igo denean dena okertu da. Zintzilikatua zegoen pertsona bat harrapatu eta lotzen zuen sokatik askatu dute, nahiz eta berak oihuka pertsona bat hiltzeko arriskua zegoela erran. Sokatik askatu dutenean, beste aldeko pertsona loturarik gabe gelditu da eta 20 metrotik behera bota dute, erorketa beldurgarri batean. Bitartean, ekintza gunean ziren 7 pertsona atxilotu dituzte, baita behean argazkiak hartzen ari zen beste bat ere".

Ekintzaileen esanetan, " Poliziak argi erakutsi du beste behin ere, nahiago dutela bizi bat arriskuan eman, Jon Anzari buruzko galderak gizarteratzea baino. Euskal gazteriari, hortaz, deia luzatu nahi diogu salaketarekin segitzeko eta biharko mobilizazioan parte hartzeko".

Gazteen bertsionea ezagutu arte, " PSOE-UMP: Qu'avez vous fait de Jon Anza ? " leloa zuen banderola zabaltzen ari zirela, haize kolpe baten eraginez, ekintzailea jauzi zela aipatu da hedabide ezberdinetan.

( Ehunka lagunek begiratu dute youtuben erorketa kari sartu bideoa )