Goruntz!

Ixabel Etxeberria

- 2 iruzkin

Abertzaleok ez dugu lan egiten soilik hauteskundeei begira, gure lan eremuak askoz eta zabalagoak dira, kudeatu behar ditugun arazoak ainitzak dira eta denei erantzuten aritu behar gara. Haatik, hauteskundeek balio digute tenperaturaren hartzeko.

Hasteko, abertzaleen arteko elkarlana hautu egokia izan dela errepikatu behar da, gure arteko tira-birak saihestu baitira, herritarren aitzinean gure boza argiagoa izan da, ozenago entzun da. Hau oso importantea da politika gero eta nahasiagoa bihurtzen delarik, krisi motak biderkatzen ari direlarik, aukerak, perspektibak, aterabideak urritzen ari direlarik. Eskuin muturraren aukera normalizatzen ari den unean.

Abertzaletasunak boz bakarra izan du, soro politikoan kide errespetagarria da, entzuten da eta konkurente seritzat hartzen da. Irain gutxiago entzuten da, trufarik ez emaitzak emendatzen baitira.

Aldi honetan ere emaitzak emendatzen dira, lan ona egiten delako, militanteen egin ahalak benetazkoak dira, nahikeriaren froga da eta lan militantea eskertzekoa da, hau gabe ez baikinateke gauden mailan. Abertzaletasunaren indarra militanteak dira.

Indar berezi bat egina izan da Kontseiluaren aldetik hautagaiengana joateko ea euskararen ofizialtasunari buruz zer zioten jakiteko eta horren berri emateko. Euskararen alde agertu dira gehiengo handian, sozialista batzuek hizkuntza ofiziala frantsesa dela gogoratzen bazuten ere.

Euskararen alde eta euskarari ematen zaion diruari begira batzuk pozik ziren Kontseilu Orokorrak hizkuntzari buruz ez zuela gauza handirik egiten ahal azpimarratzen bazuten ere. Euskerari buruz alderdi guztiak urrats baten ematera behartuak dira, hori euskaldunek egiten duten lanari esker lortzen da. Hau da oinarrizko lan ildo bat, hor tinko eta jarraikiak izan behar gara ofizialtasuna lortu arte.

Emaitzak hurbilagotik begiratzen badugu Iholdiko kantonamenduan Olzomendiren emaitzak onak dira, Caset ez delarik lehen aldian pasatzen. Juliette Bergouignanen emaitzak ere onak dira eta bigarrena izanki abertzaletasunak Hazparneko kantonamenduan irudia azkartzen du.

Angeluzainen hautuak ez du konbentzitu. Hautesleek ez dute seguruenik EAJrekiko lotura ulertu. Hegoaldean gertatzen ari diren aldaketek eragina dute militante eta boz emaileen artean, gaur egun ematen diren urrats berrietan EAJren jarrera ez da ulertzen, hemen ere ez.

Nolazbait bake prozesuari buruz EAJren jarrera zigortua izan dela erran daiteke. Gisa guztiz kostaldea eremu zaila da oraindik abertzaleentzat. Miarritze-Angelu-Baiona ongi aztertu behar den eremua da, herritarrekiko hurbiltze lana beharrezkoa da. Ez da amore eman behar, kultur lana jarraitu behar da, gure proiektu politikoari oihartzun handiagoa eman beharko zaio.

Maite Etcheverryk emaitza polita lortzen du Baionan eremua ez delarik batere errexa. Bukatzeko eta kantonamendu guztiak ez badira hemen zorrozki aipatzen hautagai guztiei goresmenak igorri behar ditugu egindako lan zintzoarengatik. Hautagaiak eskertu eta lanean aritu diren guztiak. "Abertzale " hitza gero eta hobeki ahozkatzen dute kazetariek! Aitzina goaz, emaitzak hobetzen ditugu baina lan asko gelditzen zaigu. EH Bai hautu ona dela frogatua da, aukerak ditugu kontseilari abertzaleak lortzeko. Kostaldea jorratzeko gelditzen da oraindik, gure proiektuarekin herritarrak konbentzitu behar ditugu. Urratsez urrats, lortuko dugu.