Telleria aske euroaginduari buruzko auziaren zain

- 7 iruzkin

Ion Telleria atzo goizean atxilotu zuten Lapurdin. Baionako komisaldegira eraman ondoren, gaur Paueko prokuradoreak jakinarazi dio espainiar Auzitegi Nazionalak igorritako euroagindua. Info7 irratian jarduten duen kazetari gaztea libre utzi du jujeak auzia egin bitartean. Heldu den asteartean aztertuko du auzitegiak euroagindua. Anartean, etxea eta lantokiaren artean murgildu beharko du Telleriak, egunero Donibane Lohizuneko komisaldegian aurkezteko egindua jaso duela. Kazetaria arratseko 4retan itzuli da bere lantokira, Urruñan. Bestalde, NPA alderdi ezkertiarrak euroagindua salatuz agiria zabaldu du.

Bestalde, hiru gazte Erroman atxilotu dituzte, eguerdi huntan, Italiako legebiltzarraren aitzinean antolaturiko agerraldi batean parte-hartzera joaten zirenean.

Idiazabalen sortua, Lapurdin lan eta bizi da Segi auziarekin lotzen duten Ion Telleria Info7 irratian jarduten du esatari gisa. Kale Gorria, goizeko irrati-saioan jardun ondoren, azkanaldian, arratseko albistegietan entzuten genuen kazetariaren ahotsa.

Kazetariaren lankideek elkartasun mezua zintzilikatu dute irratiaren webgunean Telleriaren atxiloketaren berri izan eta minutu batzutara.

Espainiako Poliziak 2009ko azaroan gazte independentisten aurka burutu zuen operazioaren baitan Telleria atxilotzen saiatu ziren baina ez zuten etxean aurkitu. Preseski, operazio hori saihestea lortu zuten beste hiru gazte atxilotu dituzte eguedi huntan Erroman. Fermin Martinez, Zuriñe Gojenola eta Artzain Santestebanek gazte independentisten aurkako jazarpena salatu behar zuten agerraldi horretan Jose Luis Rodriguez Zapatero espainiak presidentea Italiako hiriburuan dagoela baliatuz. Alta Italiako Legebiltzarreko plazara zihoazela Carabinieriek atzeman dituzte.

Aurore Martinen aurkako euroagindua errefusatu eta biharamunean...
Paueko auzitegiak Aurore Martin Batasunako mahaikidearen aurkako euroagindua errefusatu eta biharamunean atxilotua izan da Ion Telleria. Jarduera politikoan oinarrituriko auziak dira biak.

Baionako suprefetura aitzinean eginiko elgarretaratzean, Martinen aurkako euroagindua errefusatzea berri ona zela nabarmendu zuen Xabi Larraldek. Alta, Batasunako bozeramaleak «mobilizatuak segitzeko» gomendioa eman zuen, «prozesura hau ez dadila gehiago aplikatu lan politikoa zigortzeko».

Baionako NPA alderdiak agiria zabaldu du gaur euskal gatazkari konponbide politika eman behar zaiola aldarrikatuz eta gisa beran militante politikoen aurkako euroaginduaren prozedura baliatzea deitoratuz. Ion Telleriaren aukako auzia bertan behera uzteko eskatzeaz gain, hori eta beste kasuen aurka antolatuko diren mobilizazioetan parte hartzeko deia egiten du alderdi ezkertiarrak.